Antes de nada, comunicarvos que ó final non fichamos por Radio María: parece ser que o clero é moi cachondo e nos gastaron unha inocentada o día 28. Vaia… teñen moito sentido do humor para unhas cousas e moi pouco para outras.
Dende fai unha boa tempada, levamos falando moito do noso «Dereito a Comunicar» e da importancia do mesmo. Aínda que non é tan famoso como aquel que di que todos somos iguais ou que todos temos dereito á vida, non significa que sexa menos importante e que chegado o momento non teñamos que loitar por el. E cremos que chegou ese momento.
A nova Lei Xeral Audiovisual (LXA) -pendente de aprobación no Congreso pero que conta cos apoios de CiU e PSOE-, supón un serio e grave perigo para as radios comunitarias sen ánimo de lucro, entre as que nos atopamos nós, CuacFM. E supón un grave perigo por diversos motivos: a LXA considera ós medios comunitarios como unha «posiblidade», cando as Leis amparan e protexen o noso «dereito a comunicar»; o espazo radioeléctrico considérano un mercado, é dicir, que todo o que teña que ver con «sen ánimo de lucro», non ten cabida; impón unha limitación de 100.000 € ás radios comunitarias anuais e prohíbe todo tipo de publicidade, ¿que radio comunitaria que non pode emitir publicidade pode chegar a recaudar 100.000 €?… E nestas andamos.
Creo que non fai falla que vos digamos que o noso «Dereito a Comunicar» está recollido na Constitución e na Declaración Universal dos D.D. H.H., porque por todos é sabido. Pois parece que os políticos non o teñen moi claro. Dende a transición, as radios comunitarias foron a voz de moitos e a radio de moitos. As radios comunitarias son un ben social, e como ben social, os mandamaises teñen a OBRIGA de protexernos por facer real un dereito, o de comunicar libremente. Porque temos cabida todos: os de dereitas, os de esquerdas, os de diante e os de detrás, os dun lado e os do outro. Todos temos algo que contar e todos debemos ter o dereito a contalo. E para iso están as radios comunitarias, esas radios que queren cargarse con esta LXA.
Un dereito que dende Europa amparan, aprobando unha declaración sobre o rol dos medios comunitarios para promover a cohesión social e o diálogo intercultural. Será que aqui os nosos políticos non dan para máis. E o que é peor, que estes políticos son o reflexo da sociedade… ¿tan mal estamos como para cargarnos un dereito tan importante?.
Se cres que este dereito non te importa, estás moi equivocado. Impórtache máis do que pensas. Quizáis agora non teñas nada que contar, pero se cadra por iso tes moito que oír. Oír outras voces, outras opinións e outras reflexións que non estén atadas a un ideario nin a unha editorial. Liberdade señores, falamos da liberdade que temos de comunicar e de escoitar.
E vendo como están as cousas, estamos por entrar en casas axenas, asasinar e roubar. Digo eu que, se o «Dereito a comunicar», reflictido na Constitución e na Declaración Universal dos D.D.H.H., coa nova LXA carecerá de valor, ¿quen vai ser capaz de condenarme se eu non respeto outro dereito reflictido nesas mesmas Leis?. Papel mollado, única e exclusivamente.
Dende aquí pouco máis podemos dicir. Se queredes máis información, convidámosvos a que visitedes a web dos medios comunitarios. Porque ti tamén tes moito que dicir.
¡Saúde!
P.D.: podedes comprobar que o «Dereito a comunicar», en todo este post, vai entre «». Non fai falta que vos digamos o por que.
P.D.2: Volvemos ás ondas o 11, ás 11, no noso programa onc… sete. En CuacFM, esa radio comunitaria que nos deixa expresarnos libremente.
.